Io vulesse truvà pace di Eduardo de Filippo

eduardo-de-filippo

eduardo-de-filippo

Io vulesse truvà pace

                                             di Eduardo de Filippo

Io vulesse truvà pace;

ma na pace senza morte.

Una, mmieze’a tanta porte,

s’arapesse pè campà!

 

S’arapesse na matina,

na matin’ ‘e primavera,

e arrivasse fin’ ‘a sera

senza dì: “nzerràte llà!”

 

Senza sentere cchiù ‘a ggente

ca te dice:”io faccio…,io dico”,

senza sentere l’amico

ca te vene a cunziglià.

 

Senza senter’ ‘a famiglia

ca te dice: “Ma ch’ ‘e fatto?”

Senza scennere cchiù a patto

c’ ‘a cuscienza e ‘a dignità.

 

Senza leggere ‘o giurnale…

‘a nutizia impressionante,

ch’è nu guaio pè tutte quante

e nun tiene che ce fà.

 

Senza sentere ‘o duttore

ca te spiega a malatia…

‘a ricett’ in farmacia…

l’onorario ch’ ‘e ‘a pavà.

 

Senza sentere stu core

ca te parla ‘e Cuncettina,

Rita, Brigida, Nannina…

Chesta sì…Chell’ata no.

 

Pecchè, insomma, si vuò pace

e nun sentere cchiù niente,

‘e ‘a sperà ca sulamente

ven’ ‘a morte a te piglià?

 

Io vulesse truvà pace

ma na pace senza morte.

Una, mmiez’ ‘a tanta porte

s’arapesse pè campà!

 

S’arapesse na matina,

na matin’ ‘e primavera,

e arrivasse fin’ ‘a sera

senza dì: “nzerràte llà!”

Leave a Reply

Il tuo indirizzo email non sarà pubblicato. I campi obbligatori sono contrassegnati *